Bu gün Akademik Zərifə Əliyeva adına liseydə “LAZER” Elmi-texniki mərkəzinin direktoru, fizika-riyaziyyat elmləri namizədi Soltanhəmid Məlikovla görüş keçirildi. Tədbiri giriş sözü ilə açan məktəbin direktoru Mehriban xanım uşaqları bahar bayramının ilk müjdəçisi olan “su çərşənbəsi” münasibətilə təbrik etdi, onlara yaxşı əhval-ruhiyyə, dərslərində müvəffəqiyyət arzuladı. Daha sonra o, şagirdlərin elmi yaradıcılığa həvəsləndirilməsi və onlarda bu bacarıq və vərdişlərin inkişaf etdirilməsi üçün liseydə “Kiçik Elmi Akademiya” yaradılması təşəbbüsündən, respublikamızda çalışan alimlərin dəstək məqsədilə bu təşəbüsə qoşulmasından danışdı. Mehriban xanım bu istiqamətdə ilk məruzə ilə çıxış etməyə razılıq vermiş Soltanhəmid müəllimi toplantıda iştirak edən müəllim və şagirdlərə təqdim etdi.
Soltanhəmid müəllim fizika sahəsində əldə etdikləri elmi yenilik və ixtiralar haqqında maraqlı məruzə ilə çıxış etdi. O, şagirdlərə elmi yaradıcılğın çox maraqlı və faydalı fəaliyyət sahəsi olmasından, eləcə də elmi araşdırma metodologiyasından danışdı, “LAZER” Elmi-texniki mərkəzində yaradılmış konkret nümunələr əsasında elmi ideyaların yaranması və onların praktik realizasiyası prosesinin təfərrüatları haqqında uşaqlara maraqlı məlumatlar verdi. Məruzə zamanı nümayiş etdirilən vidioçarrxlar və fotomateriallardan ibarət təqdimatlar elmi-praktik mövzuların uşaqlar tərəfindən qavranılmasını asanlaşdırmaqla yanaşı, onları məruzə ətrafında qızğım müzakirələrin iştirakçısına çevirdi. Təsadüfi deyil ki, bir saat nəzərdə tutulmuş tədbir iki saatdan artıq çəkdi. Sonda Soltanhəmid müəllim şagird və müəllimlərin çoxsaylı suallarını cavablandırdı.
